இலங்கைத் தமிழ் அரசுக் கட்சியின் நாடாளுமன்றக் குழுத் தலைவராக இரா.சாணக்கியன் நியமனம்

இலங்கைத் தமிழ் அரசியலில் ஒரு முக்கிய தலைமுறை மாற்றத்தைக் குறிக்கும் வகையில், இலங்கைத் தமிழ் அரசுக் கட்சி (ITAK) தனது நாடாளுமன்றக் குழுத் தலைவராக 35 வயதான மட்டக்களப்பு நாடாளுமன்ற உறுப்பினர் சாணக்கியன் இராசமாணிக்கத்தை நியமித்துள்ளது.

கட்சியின் கொள்கைகள் மற்றும் பொறுப்புக்கூறல் தொடர்பான உட்கட்சி முரண்பாடுகளைத் தொடர்ந்து, சிரேஷ்ட யாழ்ப்பாண நாடாளுமன்ற உறுப்பினர் சிவஞானம் சிறிதரனுக்கு பதிலாக இவர் நியமிக்கப்பட்டுள்ளார்.

சிரேஷ்ட இராணுவ அதிகாரிகளின் நியமனங்களுக்கு ஆதரவாக வாக்களித்ததன் மூலம் கட்சியின் நீண்டகாலக் கொள்கைகளுக்கு எதிராகச் செயற்பட்டதாகக் கூறி, அரசியலமைப்புச் சபையிலிருந்து விலகுமாறு சிறிதரனுக்கு கட்சி உத்தரவிட்டது.

பதவி விலக மறுத்ததைத் தொடர்ந்து, சிறிதரன் இனி நாடாளுமன்றத்தில் கட்சியை வழிநடத்த தகுதியற்றவர் என தீர்மானித்த இலங்கைத் தமிழ் அரசுக் கட்சி அவருக்கு எதிராக ஒழுக்காற்று நடவடிக்கைகளை ஆரம்பித்துள்ளது.

கடந்த நாடாளுமன்றத் தேர்தலில் மட்டக்களப்பு மாவட்டத்தில் வரலாற்று ரீதியான அதிகூடிய விருப்பு வாக்குகளைப் பெற்ற சாணக்கியன், இராணுவ மயமாக்கலுக்கு எதிரான உறுதியான நிலைப்பாட்டைக் கொண்டவர்.

முன்னாள் தலைவர் இரா. சம்பந்தனின் தலைமைத்துவக் காலத்திற்குப் பிறகு, வடக்கு மற்றும் கிழக்குத் தமிழ் மக்களின் மாறிவரும் அரசியல் சவால்களுக்குப் பதிலளிக்கும் வகையிலும், கட்சிக்குள் பொறுப்புக்கூறலை வலுப்படுத்தும் வகையிலும் இந்த மாற்றம் பார்க்கப்படுகிறது.

இந்த நியமனம் குறித்து சிவஞானம் சிறிதரன் இதுவரை பகிரங்கமாக எவ்வித கருத்தையும் வெளியிடவில்லை.