மகளிர் சர்வதேச டி-20 இல் அதிக விக்கெட்டுகள் – தீப்தி ஷர்மா சாதனை

மகளிர் சர்வதேச டி-20 கிரிக்கெட்டில் அதிக விக்கெட்டுக்களை வீழ்த்தியவர் என்ற சாதனையை இந்தியாவின் தீப்தி ஷர்மா நிலைநாட்டினார்.

இலங்கைக்கு எதிராக திருவனந்தபுரம், கிறீன்பீல்ட் சர்வதேச விளையாட்டரங்கில் செவ்வாய்க்கிழமை நடைபெற்ற ஐந்தாவதும் கடைசியுமான மகளிர் சர்வதேச டி-20 கிரிக்கெட் போட்டியில் நிலக்ஷிக்கா சில்வாவை எல்.பி.டபிள்யூ. முறையில் ஆட்டம் இழக்கச் செய்து தனது 152ஆவது ரி20 விக்கெட்டை தீப்தி ஷர்மா கைப்பற்றினார்.

இதன் மூலம் மகளிர் சர்வதேச டி-20 கிரிக்கெட் போட்டிகளில் 151 விக்கெட்டுக்களை வீழ்த்திய அவுஸ்திரேலிய வீராங்கனை மெகான் ஷூட்டின் சாதனையை 28 வயதான தீப்தி ஷர்மா முறியடித்து முதலிடத்துக்கு முன்னேறினார்.

இலங்கைக்கு எதிராக திருவனந்தபுரத்தில் கடந்த 26ஆம் திகதி நடைபெற்ற 3ஆவது மகளிர் சர்வதேச டி-20 கிரிக்கெட் போட்டியில் 3 விக்கெட்களைக் கைப்பற்றியதன் மூலம் மெகான் ஷூட்டின் 151 விக்கெட்டுக்களை சமப்படுத்திய தீப்தி ஷர்மா அந்த சாதனையை முறியடித்தார்.

அவுஸ்திரேலியாவுக்கு எதிராக 2016ஆம் ஆண்டு சிட்னியில் நடைபெற்ற போட்டி மூலம் மகளிர் சர்வதேச டி-20 கிரிக்கெட்டில் அறிமுகமான தீப்தி ஷர்மா, இந்த 9 வருடங்களில் 133 போட்டிகளில் 130 இன்னிங்ஸ்களில் பந்துவீசி 19.00 என்ற சராசரியுடன் 152 விக்கெட்டுக்களைக் கைப்பற்றியுள்ளார்.