நியூசிலாந்து அணி இமாலய வெற்றி!

கனடா மற்றும் நியூசிலாந்து அணிகளுக்கு இடையில் சென்னை எம்.ஏ. சிதம்பரம் மைதானத்தில் இன்று (17) நடைபெற்ற ஐசிசி டி-20 உலகக் கிண்ணத் தொடரின் 31-வது லீக் போட்டியில், கனடா அணியை 8 விக்கெட்டுக்களால் வீழ்த்தி நியூசிலாந்து அணி இமாலய வெற்றியை பதிவு செய்து சூப்பர் 8 சுற்றுக்கு தகுதி பெற்றுள்ளது.

போட்டியின் நாணய சுழற்சியில் வெற்றி பெற்ற கனடா அணி முதலில் துடுப்பெடுத்தாடத் தீர்மானித்தது. கனடா அணியின் இளம் வீரரான யுவராஜ் சம்ரா நியூசிலாந்து பந்துவீச்சாளர்களைத் திணறடித்து, வரலாற்றுச் சிறப்புமிக்க சதமொன்றைப் பதிவு செய்தார்.

64 பந்துகளைச் சந்தித்த யுவராஜ் சம்ரா, 11 பவுண்டரிகள் மற்றும் 6 சிக்ஸர்கள் அடங்கலாக 110 ஓட்டங்களைக் குவித்து ஆட்டமிழந்தார். டி-20 உலகக் கிண்ண வரலாற்றில் சதம் அடித்த மிக இளம் வயது வீரர் என்ற பெருமையையும் இவர் பெற்றுள்ளதாகத் தெரிவிக்கப்படுகிறது.

யுவராஜ் சம்ரா மற்றும் அணித்தலைவர் தில்ப்ரீத் பஜ்வா ஜோடி முதல் விக்கெட்டுக்காகச் சிறப்பான அடித்தளத்தை அமைத்தது. தில்ப்ரீத் பஜ்வா 36 ஓட்டங்களைப் பெற்றார்.

அதன்படி, 174 என்ற வெற்றி இலக்கை நோக்கி பதிலுக்கு துடுப்பெடுத்தாடிய நியூசிலாந்து அணி 15.1 ஓவர்கள் நிறைவில் 2 விக்கட்டுக்களை மாத்திரம் இழந்து வெற்றி இலக்கை அடைந்தது.

நியூசிலாந்து அணி சார்பில் க்ளென் பிலிப்ஸ் 76 ஓட்டங்களையும் மற்றும் ரச்சின் ரவீந்திர 59 ஓட்டங்களையும் ஆட்டமிழக்காது பெற்றுக் கொண்டனர்.