போக்குவரத்து நெரிசலைக் குறைக்க கொழும்பில் Bus Lane திட்டம் தீவிரம்!

கொழும்பு மற்றும் அதனைச் சுற்றியுள்ள பகுதிகளில் ஏற்படும் போக்குவரத்து நெரிசலைக் குறைக்கும் நோக்கில், பேருந்துகளுக்கான முன்னுரிமைப் பாதை விதிமுறைகள் எதிர்வரும் செவ்வாய்க்கிழமை (29) முதல் காவல்துறையினரால் தீவிரமாகக் கண்காணிக்கப்பட்டு நடைமுறைப்படுத்தப்படவுள்ளன.

மேல் மாகாணத்தில் உள்ள ஏழு பிரதான பேருந்து முன்னுரிமைப் பாதைகளில் இந்தத் திட்டம் செயற்படுத்தப்படுவதாக மெட்ரோ பேருந்து அமைப்பின் தலைவர் எஸ்.எம்.யூ.பி. திலகரத்ன தெரிவித்துள்ளார்.
பயணிகள் பாதுகாப்பாகவும் உரிய நேரத்திலும் தங்களது இலக்குகளைச் சென்றடைவதை உறுதி செய்வதும், வீதி நெரிசலைக் குறைப்பதுமே இதன் முக்கிய நோக்கமாகும் என அவர் குறிப்பிட்டார்.

அத்துடன், கொழும்பு நோக்கிப் பயணிக்கும் பயணிகளின் வசதிக்காக, எதிர்வரும் செவ்வாய்க்கிழமை முதல் மெட்ரோ அமைப்பினால் இயக்கப்படும் 104 ஆடம்பரப் பேருந்துகள் புதிதாகச் சேவையில் இணைக்கப்படவுள்ளதாகவும் அவர் மேலும் தெரிவித்தார்.

இந்தத் திட்டம் தொடர்பாகப் போக்குவரத்து கட்டுப்பாடு மற்றும் வீதி பாதுகாப்பு பிரிவின் உதவி காவல்துறை கண்காணிப்பாளர்மனோஜ் ரணகல தெரிவிக்கையில்,

பேருந்து முன்னுரிமைப் பாதைகள் காலை 6:00 மணி முதல் 9:00 மணி வரையிலும், மாலை 4:00 மணி முதல் இரவு 7:00 மணி வரையிலும் செயற்பாட்டில் இருக்கும்.

குறிப்பிடப்பட்டுள்ள நேரத்தில் பிற வாகனங்கள் முன்னுரிமைப் பாதைகளைப் பயன்படுத்துவதற்கோ அல்லது வாகனங்களை நிறுத்துவதற்கோ முற்றாகத் தடை விதிக்கப்பட்டுள்ளது.

அவசர நிலைமைகள், விபத்துகளைத் தவிர்த்தல், கடும் போக்குவரத்து நெரிசலைச் சமாளித்தல் அல்லது பாதையை மாற்ற வேண்டிய அவசியம் ஏற்படும் சந்தர்ப்பங்களில் மட்டுமே பிற வாகனங்கள் இந்தப் பாதையில் நுழைய அனுமதிக்கப்படும்.

மெட்ரோ பேருந்துகள் மட்டுமன்றி, ஏனைய அனைத்து பொதுப்போக்குவரத்துப் பேருந்துகளும் இந்தப் பாதைகளைப் பயன்படுத்த முடியும்.

குறிப்பிடப்பட்டுள்ள கட்டுப்பாடுகளை மீறிச் செயல்படும் வாகன சாரதிகளுக்கு எதிராகக் காவல்துறையினர் தீவிர சோதனைகளை மேற்கொண்டு கடுமையான சட்டபூர்வ நடவடிக்கை எடுப்பார்கள் என்றும் அவர் தெரிவித்துள்ளார்.