4 ஆண்டுகளாக நிலுவைத் தொகை! யூபுன் வெளியிட்ட அதிர்ச்சி தகவல்

இலங்கை அணிக்காக விளையாடுவதற்கான நிபந்தனையாக அரசாங்கத்திடம் இருந்து 300,000 அமெரிக்க டாலர்களைக் கோரியதாக விளையாட்டுத்துறை அமைச்சர் சுனில் குமார கமகே கூறியுள்ள அறிக்கையை, தாம் வன்மையாகக் கண்டிப்பதாகவும் திட்டவட்டமாக நிராகரிப்பதாகவும் இலங்கை ஓட்டப்பந்தய வீரர் யூபுன் அபேய்கூன் தெரிவித்துள்ளார்.

கேள்விக்குட்பட்ட அந்தத் தொகையானது, 2021-ஆம் ஆண்டு முதல் அவரும் அவரது ஆதரவுக் குழுவும் பெற்றிருக்க வேண்டிய நிலுவைத் தொகைகள் மற்றும் முந்தைய அரசாங்கங்களால் வாக்குறுதியளிக்கப்பட்ட கொடுப்பனவுகளின் கூட்டுத்தொகை என்றும், தொடர்ந்து போட்டியிடுவதற்கான நிபந்தனையாக அவர் 300,000 டாலர்களைக் கோரவில்லை என்றும் அவர் கூறுகிறார்.

முந்தைய அமைச்சர்கள் அளித்த வாக்குறுதிகள் மற்றும் நான்கு ஆண்டுகளுக்கும் மேலாக நிலுவையில் உள்ள பாக்கித் தொகையின் அடிப்படையிலேயே இந்தக் கோரிக்கையை விடுத்ததாகவும், அது தொடர்பான அனைத்து ஆவணங்களும் தன்னிடத்தில் இருப்பதாகவும் யூபுன் அபேய்கூன் சுட்டிக்காட்டினார். மேலும், நான்கு ஆண்டுகளாக இழுத்துக்கொண்டிருக்கும் இந்தப் பிரச்சினையைத் தீர்க்குமாறு மட்டுமே அமைச்சரிடம் கோரிக்கை விடுத்ததாகவும் அவர் கூறினார்.

பிபிசி சிங்கள சேவைக்கு அளித்த ஒரு சிறப்புப் பேட்டியில் அவர் இதைத் தெரிவித்தார்.

மேலும் தனது கருத்துக்களைத் தெரிவித்த அவர், பணத்திற்காக மட்டுமே நாட்டுக்காக ஓடும் ஒரு தடகள வீரராக தன்னைச் சித்தரித்த அமைச்சரின் அறிக்கையால் மிகுந்த ஏமாற்றம் அடைந்ததாகக் கூறினார்.

அமைச்சரின் அறிக்கை தன்னை தேவையில்லாமல் அரசியலில் சிக்கவைப்பதாகவும், இத்தாலிய குடியுரிமை பெறுவதற்குப் போதுமான வாய்ப்புகள் இருந்தபோதிலும், மிகுந்த தேசபக்தியுடன் சர்வதேச அளவில் இலங்கைக் கொடியை ஏந்திச் சென்ற தன்னை ஒரு துரோகியாகச் சித்தரிப்பது வருந்தத்தக்கது என்றும் அவர் வலியுறுத்தினார்.

ஒரு வீரர் சிறப்பாகச் செயல்படும்போது மட்டும் அவருக்கு ஊதியம் வழங்குவதற்குப் பதிலாக, வீரர்களின் எதிர்காலத்தைப் பாதுகாக்கும் வகையிலான ஒரு முறையான ‘விளையாட்டு ஒப்பந்த’ அமைப்பு நாட்டில் இருக்க வேண்டும் என்று யூபுன் சுட்டிக்காட்டுகிறார். அத்தகைய அமைப்பு இல்லாததால், வீரர்கள் பயிற்சி மற்றும் உபகரணங்களுக்காகத் தங்கள் சொந்தப் பணத்தைச் செலவழிக்க வேண்டியுள்ளது என்றும், இது ஒரு சர்வதேச வீரருக்குத் தாங்க முடியாத அழுத்தமாகும் என்றும் அவர் குறிப்பிடுகிறார்.

அரசாங்கம் நிதி வழங்கத் தவறியது மட்டுமல்லாமல், பல ஆண்டுகால விரக்தி, விளையாட்டுத் துறைக்குள் நிலவும் ஸ்திரத்தன்மையின்மை மற்றும் தேசிய விளையாட்டுக் கொள்கை இல்லாதது ஆகிய காரணங்களாலும் விளையாட்டிலிருந்து ஓய்வு பெறும் முடிவு எடுக்கப்பட்டது என்று யூபுன் அபேய்கூன் மேலும் தெரிவித்தார்.